Stari puti Leprinca – druga radionica

Subotu – 28.9. skupilo se j’ 13 leprinčani i osan člani udrugi “4 grada Dragodid” za nastavak urejenja stazi na ulaze va Leprinac i obnovi suhozidi.

Uz pomoć jenega manjega bagera proširen je ulaz na stazu leprini, a  posajene su i biljke ke rastu po Leprince. Planinari Boris i Davorka obradili su točke 4 i 5 na staze – se pohvale za kreativnost!

Boris i Vilim popilili su dreva na Tičarici tako da j’ staza sada prohodna. Udruga “Kamelija” na čelu z dopredsjednikon Vilimon i još četiri člana je uredila točke 1 i 2, odnosno ulaz i atrij. Leprinčani su uredili točku 3 ku će daje urejevat školani skupa z učiteljicami z školi Leprince. Uredil se j’ i ulaz ki je nasut z peskon.
Na staze je još dela i bit će još radneh akcij. Pohvale sen na odvojenen vremene i dobroj voje i nadamo se da će drugi put bit još više takov judi! Kako je to subotu zgjedalo morete pogledat tu na oveh slikah.

Finjena prva faza obnovi sali

Gradonačelnik Opatiji Ivo Dujmić z svojmi kolegami prišal je 03.09. obać kako napreduju radovi na sale. Prvi dio dela je odbavan, a potrošeno je skoro milijun kun.

Va sale su zrušene dve drvene konstrukcije ke su bile nutre mej kati, a storene su dve armiranobetonske ploče pa sada imamo potpuno upotrebljivo potkorovlje. Napravna je priprema za struju, vodu, hidrantsku mrežu i kanalizaciju. Kada je jako dažjilo, voda j’ tekla va salu, ali i to je sada rešeno, voda više neće teć nutra aš je spejana van na glavnu cestu. Ingo Kamenar ko predstavnik izvođača radovi je zaključil kako je finjena najteža, konstruktivna faza, aš je storeno se nanovo, osim vanjskeh zidi i da j’ sala parićana za nastavak finejeh nutarnjeh radovi.

Gradonačelnik Dujmić je rekal kako su radovi na Dome va Leprince  jena od većeh investicij ke trenutno Grad Opatija financira va opatijsken zaleđu. Tu se dela od sveobuhvatneh radovi na potpunen preurejenju postojeće zgradi ka će, kada se bude gotovo, ispunjavat se društvene, kulturne i zabavne potrebe Leprinčani. Uz Mjesni odbora Leprinac-Učka, na skoro 600 četvorneh metar prostora nać će se se udruge z područja Leprinca isto ko i veli prostor za izložbe, pjesničke večeri i slični kulturni i zabavni programi.

Vaje počinju i radovi na proširenju zgradi dečjega vrtića Leprinac, a preostaje još uredit jedan adekvatan parking va centre Leprinca, z čen bi se zaokružil investicijski krug va Leprince i osigurala veća kvaliteta života, zaključil je Dujmić.

Radovi su va prvoj fazi, skupa z potpunun rekonstrukcijun krova od lane, vredni su oko milijun kuna, a šoldi za nastavak radovi osigurat će se z Gradskega proračunom va sledeće dve leta.

Mi školani

Autorica teksta:   Darinka Martinčić

Počela san hodit va prvi razred 1954. leta. Z’ Zagrada san šla samo ja, a pul Lučetić me j sako jutro čekal Ivo Nevenkin pa smo se skupa spustili pod Ćorinovu kuću vanka na Stubaj. Z Brega su već prihajale Marija i Bogdana, a kad smo obrnuli va Presiku zjapali smo se z Začani. Eo….! Eo…bi odgovorili Igor i dve Ivanke. Na pol Presike z vašanske strani doprišli su Dragan i Merica i to j bila moja prva škvadra školanska. Grnuli smo zgoru okolo Žanineh pa va školu.

A za nazada zdolu po isten pute. Ta naš put po Presike, ki to more pozabit. Provujen zamislet umejki urejeni i poštrpani, ravnice i rebri pokošene i pograbne. Jesenići i leski ki su pušćani rast po porubah bili su nan za obešat se i cimbujat – ki j vredan ča većaga prignut, a onda se skupa šnjin dignut ča više vajer. Rebri su bile za vajat se, a prezidi za skakat ki će z višega i ki će dodaje. Škola je finjevala okol jedanajste, a nas je čuda puti polne zateklo na pol puta. Naša prva prava učitejica, Neda Kekler, prišla nan je komać va drugen razrede. Bila je samo desetak let stareja od nas, aš mi smo njoj bili prvi školani. Najboje san ju zapametila i najviše volela od seh svojeh učiteji. Prnesla je novi načini ponašanja va škole. Ni više bilo komandi „ruke na leđa“, ni palice al ravnala za  po prsteh opeć. Više ni bil važan krasopis, nego ča j ki napisal. Ka sreća moć posudit knjigu za doma, šetnje va prirodu i prve priredbe va sale. Okol školi smo se igrevali na „gnjilo jaje“, „išla majka s kolodvora“, „modra škarica“, lovilo i skrivalo da se ne govori. Muški su se va to vreme još vavek igrali na nemci i partizani…kauboji i indijanci su prišli kašnjeje. Va teh borbah čuda puti bi stradale brajde i zelenilo okolo Jovaninove kući, tako da j brižna gospodarica morala kričat i prihajat protestirat va školu. Hodili smo i mi na vjeronauk, samo gore va crekvu. Gušt je bil igrat se okolo crekvi na gare. Bil je to naš Preluk. Glavni j bil Igor ki je već onda imel doma motor. Posložil nas je va filu i podelil – ti si Talija, ti si Nemaška – ne znan koliko smo opće držav znali. V rukah smo mesto timuna stiskali kus palice, a onda start! Njrrrr, njrrrr – prvi krug, drugi krug… Va škole smo još imeli i našu tetu Pepicu Jakovinovu ka nan je sama pekla kruh i parićevala najboje marende. Ni sada ne znan zač mi ni bila doma nikada tako dobra maneštra kako oni njiji oriži i fažol. A Unrin narančasti sir?!

Najde se još na kakoven šufite zahitan požutel libar al pisanka zamotana va modru kartu. I črnobele slike va staren albume na dno škabelina od bora. Kolori i dihi tega vremena ostali su zapisani va srcu za vavek, aš ne reče se za niš – od koljevke pa do groba, najljepše je đačko doba!

Ruscus Aculeatus – Leprinačka leprina

Nakon urejenja stazi ljekoviteh biljki ka vodi prema crekve Svetega Markota, nastavja se z promoviranjen Leprinca. Pomalo se stvara i nadopunjuje brend Leprine i Leprinca, pa se je tako storil novi video film od edukativne stazi i od naše leprini.

To je prvi i (zasad) jedini film ki govori od te biljki. Staza ima namjenu navadit i upoznat judi z biljkami ke tu rastu, a i lepo ju je videt – pokošeno, postavjena je info tabela, posajene su rožice…

Autor videi keh morete tu pogledat je Rajko Ukić, a temu je prezentirala fitoterapeutkinja Zdenka Klanjac Ukić.

13. Učkarski samanj

Prva nedeja va deveten mesece, sad već tradicionalno, rezervirana je za Učkarski samanj. Saki ki je prišal na samanj, našal je neš za se. Štandi je bilo čuda, judi još više, a bilo je neš i blaga.

Na štandeh se je moglo pokusit i kupit domaćeh siri, pršuta i drugeh mesneh delicij, marmeladi, slašćic, maslinovega ula, likeri, rakiji, vina… Gljivarsko društvo je ko i sako leto imelo edukativan štand s izloženemi lukići kade je saki kega je ča zanimalo mogal pitat i upoznat nove sorte ke rastu va našeh šumah. Dečina su imela svoj program i radionice, a leprinački školani imeli su i svoju priredbu.

Galeriju slik z Učki morete pogjedat ovde.

 

 

 

Počeli su radovi na urejenju centra

Petak, 12.7. vredni delavci z Komunalca, asfaltirali (nekada bi se reklo “začrnili”) su marćapiju od Staji do Zatki. Obzirom na to da na toj rute je čuda pješaci i šetači, ovo je jedan veli napredak za Leprinac. U planu je i daljnje urejenje centra Leprinca, pješačkeh stazi i oznaki za turisti i za si drugi ki se tu najdu.

Korše na Učku

Va organizacije AK Opatija Motorsporta održana je nedeju druga korša na Učke ovo leto. Pejalo je više od 140 šoferi – stareh i mladeh, muškeh i ženskeh, našeh, Slovenci, Talijani…  Se je pasalo bez većeh incidenti, iako su se neki razbili i pokvarili, dežurne su službe to rešile čin su brže mogle. Staza je bila duga 3.800 metar, a start je bil pul Tumpić, zgora okretišta od kurjeri. Prva je korša startala oko 11 i pol, a proglašenje je bilo na igralištu pul Tumpić oko 6 i pol zapolne.

Bodovalo se je za Prvenstvo Istarske Rivijere, HAKS Kup Formula Driver, Prvenstvo Auto i Karting Saveza Istre, Prvenstvo Auto i Karting Lige Zapad. Neki od našeh lokalneh vozači ki su nastupali: Alberto Jeletić va Fiate 127 i Robert Pešćica va Citroene C2 ko članovi AK Opatija,  Željko Macarol va Fiate Punto ko član AK Opatija Motorsport i još čuda drugeg, aš ipak, naš je kraj poznat po ten da ima čuda ljubitelji brzine i korši.

Klape va Leprince

11. večer klapa va Leprince bila j’ pasanu subotu – 13.7. pod Ložun va Staren Grade. Ovo leto nastupali su klapa Volosko, klapa Kamelija z Opatiji, klapa Teranke i klapa Brnistra z Puli, klapa Castrum Vallis z Bal, klapa Vidulice i klapa Flumen z Reki, klapa Škvadra z Košani (Slovenija), klapa Škrljevo, klapa Vinčace z Novega Vinodolskega i klapa Mirakul z Leprinca. Gosti večeri su bili člani folklornega ansambla „Zora“, program je vodil Mario Lipovšek Batifiaca.

Dobar odaziv publiki govori kako je ovaj događaj pun pogodak za Leprinac!

Leprinačka vrtićarska fešta va Staje

Trećo leto za redon- roditelji ( i si drugi dobri judi) dečina i „teti“ z vrtića – storili su pravu feštu na otprten va Staje – nedjelju 9.06.2019. 

Muški su se tuta forca borili z travinun do pasa. Kosili, trimerali, grabili, potili. Dečina i teti su vredno delali celo leto da tokaju šoldići za roštilj i pijaču. Najveć tega odbavimo z našen slatken programom ki se nudi na Markovoj. Čuda drugeh lepeh stvar (slaneh i slatkeh) storile su vredne ruki našeh mam, tet, nonic, sused. Dečina su zakantala, zatancala i malo munjesla( a i oni veći su bili fanj priložni) pa su se vozile bicikleti, igral nogomet, potekovalo z balami i baluni, a obašli smo i zlatne ribice.

Pozdravili smo oneh najstarejeh ki nan gredu h letu va šklu- podelili eko borše od žutice ke su deca s tatami popiturala pa smo još va njih stavili likovni crteži i njihove razvojne mape.

Na vrtić će ih spamećevat i foto session na Brituhe i slika (fotografija) ku smo njin regalali. Zasopla je armunika a pala je i potresuljka. Muzika ka nan je celo vreme sopla bila nan je sen jušto po gušte. Roštilj je bil pre dobar, a meštri od njega morda još i boji. I ča reć na kraje.

Sen te juden dobre voji jeno velo „Hvala…i vidimo se h letu!“ 

autor teksta: Lea Brcic

Aktivan vikend va Leprince

Pasani vikend se je va Leprince dogajalo čuda tega… Subotu i nedeju – radna akcija obnavjanja suhozidi i urejenja šumskega puta od Tumpić prema Steremu gradu. 08.06. od 5 zapolne je fešta „Ruscus“ oživela celi Stari grad, a nedeju je Staja bila puna dečine, mami, tati, noni i nonići…

Kako smo raneje tu i najavili, 08. i 09.06. održana je radna akcija na pute ki vodi od Tumpić proti crekve Svetega Markota. Kosilo se je, grabilo, popililo kakovo drevo, porezalo graju i suhe grane oko puta, a stručnjaci z udrugi „4 grada Dragodid“ vodili su slaganje suhozidi.

Okupjanje je bilo subotu i nedeju do 10 ur pul crekvice Svete Jeleni pul igrališta, na 10 ur sastanak da se dogovori ki će, kade, ča i z čen delat i od 10 se je delalo do kada je ki mogal i zdural.

Vreme nas je seh skupa dobro poslužilo. Morda je bilo kapić preteplo za tuć i znašat kamiki, ali hlada i mrzle pijači se je vavek našlo.

Petak nas je bilo preko trejset, nedeju neš malo manje, ali storilo se je ča je bilo planirano. Ograda na ulaze pul cesti je finjena, parićana su mesta kada će bit postavjene info i edukativne tabele, trava j’ pokošena i pograbjena, put je prohodan i čist.

Svakako je tu još dela i bit će organizirano još radneh akcij, a o temu ćemo vas obavijestit na dobu da se znate parićat i prit pomoć.

Ovaj vikend va Leprince ni falilo judi, auti ni turisti, ma nisu si prišli delat suhozidi i čistit put. Neki su prišli i samo na feštu ka je bila od 5 ur va Staren grade. Od loži pa se do same crekvi Svetega Markota se je bilo puno lampic, umjetniki, recitatori, pjesnici, slik, muziki, štandi z domaćun hranun, pijačun i drugemi domaćemi proizvodi. Čuda je judi prišlo videt ča se to dogaja i ča je to se skupa i nisu ostali razočarani. Soplo i kantalo se j’ pul loži, spred crekvicun Svete Ani, na brituhe – čak na dva mesta, a po prvi put Leprinac je imel i svojo kino. Točno na 9 ur večer na velen platne pul crekvi si zainteresirani mogli su odgjedat film „Casablanca“. Nakon filma, moglo se je’ ča popit i pojist, poslušat koncert benda „Tribute to Amy Winehouse – Amy’s House“.


>> Kako je se to skupa zgledalo pogledajte va fotogalerije <<

1 2