Autor: Jelena

Ruscus Aculeatus – Leprinačka leprina

Nakon urejenja stazi ljekoviteh biljki ka vodi prema crekve Svetega Markota, nastavja se z promoviranjen Leprinca. Pomalo se stvara i nadopunjuje brend Leprine i Leprinca, pa se je tako storil novi video film od edukativne stazi i od naše leprini.

To je prvi i (zasad) jedini film ki govori od te biljki. Staza ima namjenu navadit i upoznat judi z biljkami ke tu rastu, a i lepo ju je videt – pokošeno, postavjena je info tabela, posajene su rožice…

Autor videi keh morete tu pogledat je Rajko Ukić, a temu je prezentirala fitoterapeutkinja Zdenka Klanjac Ukić.

13. Učkarski samanj

Prva nedeja va deveten mesece, sad već tradicionalno, rezervirana je za Učkarski samanj. Saki ki je prišal na samanj, našal je neš za se. Štandi je bilo čuda, judi još više, a bilo je neš i blaga.

Na štandeh se je moglo pokusit i kupit domaćeh siri, pršuta i drugeh mesneh delicij, marmeladi, slašćic, maslinovega ula, likeri, rakiji, vina… Gljivarsko društvo je ko i sako leto imelo edukativan štand s izloženemi lukići kade je saki kega je ča zanimalo mogal pitat i upoznat nove sorte ke rastu va našeh šumah. Dečina su imela svoj program i radionice, a leprinački školani imeli su i svoju priredbu.

Galeriju slik z Učki morete pogjedat ovde.

 

 

 

Počeli su radovi na urejenju centra

Petak, 12.7. vredni delavci z Komunalca, asfaltirali (nekada bi se reklo “začrnili”) su marćapiju od Staji do Zatki. Obzirom na to da na toj rute je čuda pješaci i šetači, ovo je jedan veli napredak za Leprinac. U planu je i daljnje urejenje centra Leprinca, pješačkeh stazi i oznaki za turisti i za si drugi ki se tu najdu.

Korše na Učku

Va organizacije AK Opatija Motorsporta održana je nedeju druga korša na Učke ovo leto. Pejalo je više od 140 šoferi – stareh i mladeh, muškeh i ženskeh, našeh, Slovenci, Talijani…  Se je pasalo bez većeh incidenti, iako su se neki razbili i pokvarili, dežurne su službe to rešile čin su brže mogle. Staza je bila duga 3.800 metar, a start je bil pul Tumpić, zgora okretišta od kurjeri. Prva je korša startala oko 11 i pol, a proglašenje je bilo na igralištu pul Tumpić oko 6 i pol zapolne.

Bodovalo se je za Prvenstvo Istarske Rivijere, HAKS Kup Formula Driver, Prvenstvo Auto i Karting Saveza Istre, Prvenstvo Auto i Karting Lige Zapad. Neki od našeh lokalneh vozači ki su nastupali: Alberto Jeletić va Fiate 127 i Robert Pešćica va Citroene C2 ko članovi AK Opatija,  Željko Macarol va Fiate Punto ko član AK Opatija Motorsport i još čuda drugeg, aš ipak, naš je kraj poznat po ten da ima čuda ljubitelji brzine i korši.

Klape va Leprince

11. večer klapa va Leprince bila j’ pasanu subotu – 13.7. pod Ložun va Staren Grade. Ovo leto nastupali su klapa Volosko, klapa Kamelija z Opatiji, klapa Teranke i klapa Brnistra z Puli, klapa Castrum Vallis z Bal, klapa Vidulice i klapa Flumen z Reki, klapa Škvadra z Košani (Slovenija), klapa Škrljevo, klapa Vinčace z Novega Vinodolskega i klapa Mirakul z Leprinca. Gosti večeri su bili člani folklornega ansambla „Zora“, program je vodil Mario Lipovšek Batifiaca.

Dobar odaziv publiki govori kako je ovaj događaj pun pogodak za Leprinac!

Leprinačka vrtićarska fešta va Staje

Trećo leto za redon- roditelji ( i si drugi dobri judi) dečina i „teti“ z vrtića – storili su pravu feštu na otprten va Staje – nedjelju 9.06.2019. 

Muški su se tuta forca borili z travinun do pasa. Kosili, trimerali, grabili, potili. Dečina i teti su vredno delali celo leto da tokaju šoldići za roštilj i pijaču. Najveć tega odbavimo z našen slatken programom ki se nudi na Markovoj. Čuda drugeh lepeh stvar (slaneh i slatkeh) storile su vredne ruki našeh mam, tet, nonic, sused. Dečina su zakantala, zatancala i malo munjesla( a i oni veći su bili fanj priložni) pa su se vozile bicikleti, igral nogomet, potekovalo z balami i baluni, a obašli smo i zlatne ribice.

Pozdravili smo oneh najstarejeh ki nan gredu h letu va šklu- podelili eko borše od žutice ke su deca s tatami popiturala pa smo još va njih stavili likovni crteži i njihove razvojne mape.

Na vrtić će ih spamećevat i foto session na Brituhe i slika (fotografija) ku smo njin regalali. Zasopla je armunika a pala je i potresuljka. Muzika ka nan je celo vreme sopla bila nan je sen jušto po gušte. Roštilj je bil pre dobar, a meštri od njega morda još i boji. I ča reć na kraje.

Sen te juden dobre voji jeno velo „Hvala…i vidimo se h letu!“ 

autor teksta: Lea Brcic

Aktivan vikend va Leprince

Pasani vikend se je va Leprince dogajalo čuda tega… Subotu i nedeju – radna akcija obnavjanja suhozidi i urejenja šumskega puta od Tumpić prema Steremu gradu. 08.06. od 5 zapolne je fešta „Ruscus“ oživela celi Stari grad, a nedeju je Staja bila puna dečine, mami, tati, noni i nonići…

Kako smo raneje tu i najavili, 08. i 09.06. održana je radna akcija na pute ki vodi od Tumpić proti crekve Svetega Markota. Kosilo se je, grabilo, popililo kakovo drevo, porezalo graju i suhe grane oko puta, a stručnjaci z udrugi „4 grada Dragodid“ vodili su slaganje suhozidi.

Okupjanje je bilo subotu i nedeju do 10 ur pul crekvice Svete Jeleni pul igrališta, na 10 ur sastanak da se dogovori ki će, kade, ča i z čen delat i od 10 se je delalo do kada je ki mogal i zdural.

Vreme nas je seh skupa dobro poslužilo. Morda je bilo kapić preteplo za tuć i znašat kamiki, ali hlada i mrzle pijači se je vavek našlo.

Petak nas je bilo preko trejset, nedeju neš malo manje, ali storilo se je ča je bilo planirano. Ograda na ulaze pul cesti je finjena, parićana su mesta kada će bit postavjene info i edukativne tabele, trava j’ pokošena i pograbjena, put je prohodan i čist.

Svakako je tu još dela i bit će organizirano još radneh akcij, a o temu ćemo vas obavijestit na dobu da se znate parićat i prit pomoć.

Ovaj vikend va Leprince ni falilo judi, auti ni turisti, ma nisu si prišli delat suhozidi i čistit put. Neki su prišli i samo na feštu ka je bila od 5 ur va Staren grade. Od loži pa se do same crekvi Svetega Markota se je bilo puno lampic, umjetniki, recitatori, pjesnici, slik, muziki, štandi z domaćun hranun, pijačun i drugemi domaćemi proizvodi. Čuda je judi prišlo videt ča se to dogaja i ča je to se skupa i nisu ostali razočarani. Soplo i kantalo se j’ pul loži, spred crekvicun Svete Ani, na brituhe – čak na dva mesta, a po prvi put Leprinac je imel i svojo kino. Točno na 9 ur večer na velen platne pul crekvi si zainteresirani mogli su odgjedat film „Casablanca“. Nakon filma, moglo se je’ ča popit i pojist, poslušat koncert benda „Tribute to Amy Winehouse – Amy’s House“.


>> Kako je se to skupa zgledalo pogledajte va fotogalerije <<

Kad se male ruke slože…

Pasanu subotu, 25. maja je nakon dani i dani padanja dažja napokon i pul nas zasvetilo sunce. Kako je takov dan najboje provest na oprten, nadihat se friškega zraka i usput ča korisnega i storit, tako su se na inicijativu precjednika MO Leprinac – Učka, na igralištu pul Tumpić okupila deca z Leprinca kako bi uredila igralište. Neki su meli i spuhevali pešćeve, neki pobirali smeti, neki se vozili z bičikletami, a neki igrali na balu – kako se reče, bitno je sudjelovat.

Ova je akcija za svaku pohvalu! Hvala mjesnemu odboru i semi ki su pripomogli da igralište pul Tumpić bude čisto i uredno.

Stari puti – suhozidna arhitektura Leprinca

Druženje uz edukativnu predavanje „Stari puti – suhozidna arhitektura Veprinca“ održano je va prostorijah Kulturnega društva Leprinac krajen trećega meseca. Mario Zaccaria z Udrugi „4 grada Dragodid“ prezentiral je značaj očuvanja suhozidi. Spomenuta udruga je osnovana 2007. leta, a sjedište udrugi je va Šapjanah. Udruga djeluje z ciljen očuvanja suhozidne baštini, a glavne aktivnosti su njoj organizacija i provođenje suhozidneh radionic. Također, proučavaju i istražuju suhozidi skupa z lokalnemi partneri, izvornemi nositelji umijeća delanja suhozida i z judi ki dobro poznaju lokalnu tradiciju. Udruga organizira čuda radionic z ciljen obnovi i očuvanja suhozidi, a njiha glavna radionica održava se va Petrebišću na Učke.

Prva takova radionica va Leprince bit će održana 8. i 9.6.2019. na zapušćenen pute zdola Frčićeveh. Obnavjat će se skalini i zrušeni zid pokle skalini, proti Korićevemi orehi. Sveh zainteresiraneh pozivamo da se prijave z mailon ili na neki od oveh broji telefona: 098/305-395, 091/885-2422, 095/22299-084.:

Na predavanju je bilo govora i od ideji da se Leprince stori edukativna staza ljekoviteh biljak, z posebnen naglaskon na leprinu, a staza bi kretala od Svete Jeleni i finjevala pul crekvice Svete Mariji va Staren grade. Ta je ideja samo jedan mići kušćić velega projekta „Revitalizacija grada Veprinca“, a začetnik projekta i same ideji je gospodin Rajko Ukić. Osnovna ideja i prvi korak je uredit pješačke staze po i oko Leprinca kako bi se privuklo čin više turisti, šetači i planinari. U sklopu njih posjetitelji bi mogli videt i z prve ruki doživet se lepote i čari našega posebnega kraja, upoznat se z povijesti Leprinca, navadit ke biljke tuda rastu, ke su od njih ljekovite, a ke zaštićene, na ki se način moru iskoristit i još čuda tega.

Kako je bilo na predavanju pod ložun, pogledajte na slikah…

Veći vrtić za više dece

Jedna jako lepa vijest za si judi Leprinca, za se sadašnje i buduće mame i tate, za si sadašnji i budući vrtićari: Leprinac dobija novi dečji vrtić!

Šoldi su osigurani z europskega fonda i to ni manje ni više nego 5.435.717,05 kun, odnosno skoro 5 i pol miljoni. Projekt je pisal Grad Opatija i to pod natječaj „Ulaganje u pokretanje, poboljšanje ili proširenje lokalnih temeljnih usluga na ruralno stanovništvo, uključujući slobodno vrijeme i kulturne aktivnosti te povezanu infrastrukturu“. Kako je Grad Opatija provoditelj projekta, oni će i sufinancirat dio radovi u sklopu ovega projekta. Obzirom da su šoldi sada osigurani, si čekamo da se počne ča i delat, a po plane radovi bi trebali krenut krajen sedmega meseca ovo leto. Novi, veći i lepči vrtić svoja vrata dečine bi trebal opret do manje od dve leta – početkon 2021. Delat će se na postojećoj zgrade vrtića. Zgrada će bit proširena, nadozidana, a uredit će se prizemlje i kat va ken će bit dnevni boravak, sanitarni čvor, garderobe, a uredit će se i okoliš, odnosno igralište oko školi i vrtića.

Bitno je za reć kako će se kapacitetet dečjega vrtića poduplat, pa tako je sada va leprinačken vrtiće 27 dece, a pokle ča se obnovi i nadogradi moć će primit 50-ak vrtićari!

1 2 3